history

BAWNGKAWN BRANCH YMA
(17th November, 1968 – 17th November, 2018)
– Lalberchhandama
Secretary, Br. Y.M.A

Bawngkawn Branch YMA chuan Kum 50 na (Golden Jubilee) kanlo thleng ve ta reng mai a, hetiang hun kan thlen theihna chhan hi Pathian awmpuina leh venna vang liau liau ani kan ti thei awm e, Hruaitu hmasa te inpekna / thawh hona zarah tluang tak a, harsatna liantham awm lova tun hun kan thleng thei hi a ropui in a lawmawm takzet bawk ani. Bawngkawn Branch YMA chanchin tlangpui han tarlang chho dawn ila, hemi atan hian Hruaitu hmasa mifel tak tak te’n record felfai tak mai min lo hnutchhiah hlauh mai a, hei hian awlsamna tam tak min siam sak a, a lawmawm hle ani. 1968-2003 (Coral Jubilee) inkar ami phei hi chu hruaitu hmasa te report lo siam tawh ang hi reference ah kan rawn hmang chho mai dawn a, a chhan pakhat ah chuan Minute bu hlui bo thlau a awm tlat mai a, engemawchen han chhui theih loh thil a awm vang ani bawk.

17th November, 1968 (Chawlhni) :-
Tv. Vanlaltawna (Convener) huaihawt in Sunday School Inkhawm ban ah Pu Chawnghmingliana (Tunah chuan Bawngkawn South anni ta) te In ah Bawngkawn thalaite kalkhawm in, ‘YOUNG MIZO ASSOCIATION (Y.M.A), BAWNGKAWN BRANCH’ chu lungrual taka din ani.
Bawngkawn Branch Y.M.A hruaitu hmasa ber chu hetiang hian in ruat ani –

OFFICE BEARERS :

President : Pu Dawngliana
Vice President : Tv Vanlaltawna
Secretary : Tv K. Zokhuma
Asst. Secretary : Tv Kapthanga
Treasurer : Pu Chawnghmingliana
Fin. Secretary : Tv Zalena

COMMITTEE MEMBER TE :
1. Pu Thanzuala 2. Tv. Zairema 3. Tv. Chaure-a
4. Nl. Laikungi 5. Nl. Malsawmi

Bawngkawn Branch Y.M.A din chhoh anih atang hian theihtawp chhuah in Y.M.A dinchhan leh thil tum te tih hlawhtlin tum a hma lak chhoh ani a, Veng inpumkhat thu ah te, tanpui ngai te tanpui, Lusun khawhar, damlo mangang te tan a Nu leh Pa nih tling tak leh Zirna leh Veng hmasawnna kawng ah nasa tak a tan lak ani a, Veng mi te pawn an thlamuanpui takzet ani. Hruaitu hmasa ten theihtawp chhuah a kan Pi leh Pu ten an lo vawn ‘Tlawmngaihna’ chhawm nun kawng a hma an lo lak na chuan tun hun thleng a Tlawmngaihna vawn nun kawng ah pawh an zar kan zo in mualpho lovin kan awm te pawh ti i la a dik viau awm e. Y.M.A din tirh (1968) kum hian member 26 awm in, a tu amah bobang awm lovin leh hruaitute tih tur chauh a dah lovin kawng engkim ah lungrual taka an thawhhona te hi a entawn tlak takzet a, keini thangthar zawk te tan hian chona nasa tak min hnutchhiah ani.

Heng mai bakah hian an hmalakna tam tak neiin, chung zawng zawng te erawh chu kan thai lang seng dawn chuanglo a, Bawngkawn Branch Y.M.A in tun hun thleng a kan chet velna, Kum pawimawh leh Veng in hma a sawn chhoh dan kan hriat ang ang te han tarlang ila –

  • Bawngkawn Branch Y.M.A din kum (1968) hian member 26 awmin, Central Y.M.A zawmna fee Rs 2/- pawh pek nghal ani a. Tin, Hemi kum vek hian Y.M.A bungrua, No – 30, Tray – 2 leh Bel lian – 1 lei ani bawk.
  • 2nd December, 1968 ah Y.M.A hnatlang hmasa ber neih niin, VC House (Tuna Bawngkawn South Br. Y.M.A in Hall an sakna) bul a Tuikhur hiah hnatlang neih ani a, a hming ah ‘Y.M.A Tuikhur’ vuah ani.
  • Kum 1969 atangin Vengchhung then thianghlimna kawngah leh Sual do kawngah te hmalak tan niin, kan veng thenawm Chaltlang leh Ramhlun te nen Joint Meet ing te neih niin 1975 bawr thleng khan hma lak ho thin ani.
  • 26th January, 1971 khan Pi Darteii (Hmeithai) In sak thatsak ani a, a chung tur ‘DI’ leina’n Rs 30/- (lai) hman ani.
  • Kum 1972 atangin Tlawmngaihna chungchang ah Vengchhung a Tlangval tlawmngai thlanna a hmasaber atan neih ani a, hetah hian Tv. Kapmawia chu Tlawmngai Certificate pek ani.
  • Kum 1973 atangin Chhiat tawk an awm in Buhfai leh Thing mumal taka khawn tan ani.
  • Kum 1973 khan a hmasa ber atan Vengchhung a mi harsa tanpuina khawn ani a, hetah hian Pi Lalkungi te tanpuina tur khawn niin, Buhfai No – 112, Pawisa fai Rs 18.30p leh Atta No – 2 (lai)khawn chhuah ani.
  • Kum 1976 atangin Branch Y.M.A tha tichak turin Section din tan ani a, Section pathum din niin Y – Section, M – Section leh A – Section te niin, Kum 1979 ah tihdanglam niin Section hnih Taitesena Section leh Vanapa Section a siam a ni.
    Kum 1978 atangin Kuang khuhna hman tan ani a, Thlanmual Shed rel tan ani.
  • Kum 1978 hian Khawpui chhung Y.M.A Branch Lengkhawm Zai intihsiakna ah Lawmman pakhatna kan dawng.
  • Kum 1980 atangin Thlanmual enkawl dan mumal zawk a siam niin, mithi hming leh an phumna te record vawn tan ani.
  • Kum 1982 ah Chaltlang atangin Village Council kan indang.
  • Kum 1985 ah Saizahawla Section siam belh leh niin, Section pathum : Taitesena Section, Vanapa Section leh Saizahawla Section te anni.
  • Kum 1988 ah Bank ah Branch Y.M.A hming a Savings Account hawn tan ani.
  • Kum 1989 atangin Chhiat tawh chungchang a mipuite hriattir nan Darkhuang hman tan ani.
  • Kum 1990 atangin Y.M.A chanchinbu ‘FINNA’ chhuah tan ani. Hemi kum vek hian Branch Y.M.A pualin Typewriter lei / neih ani bawk.
  • Kum 1991 atangin Section zawng zawng tan Seal siam sak ani.
  • Kum 1991 vek hian Y.M.A Hall -cum- Indoor Stadium Land Lease neih ani a, Kum1992
    ah Y.M.A Hall -cum- Indoor Stadium Committee din niin Kum1994 ah Hall sak tan ani.
  • Kum 1991 hian Central Y.M.A buatsaih Inter Branch Y.M.A Volleyball (Men) Tournament ah Final lut in Lawmman pahnihna kan dawng.
  • Kum 1991 ah Central Y.M.A buatsaih Y.M.A Chhang Tournament ah tel ve niin, Semi- Final kan thleng
  • Kum 1992 atangin Sub – Committee peng siam tan ani.
  • Kum 1994 ah Section thum atangin Section panga ah tih len niin, Khuangchera Section, Neuva Section, Saizahawla Section, Taitesena Section leh Vanapa Section te anni.
  • Kum1994 ah Pi. Hangi Lunglen Tlang pangah Social Re-forestry siam tan ani a, helai hmun hi uluk taka enkawl chhoh niin a enkawl turin Social Re-forestry Sub-Committee siam ani a, Forest Department te nen thawk ho in, tun dinhmun ah Thing tiak sing chuang fe phun tawh niin, a sam fai, mei kawng sial, a hung hnathawh, etc hnatlang vawi tam tak neih tawh ani bawk.
  • Kum 1995 ah Y.M.A Hall, a chung rangva, a bang Dap, a chhuat Thingphel a sak niin Ni.28/12/1995 khan a hmasaber atan Branch Y.M.A (1996) hruaitu thlan nan Y.M.A Hall hman ani.
  • Kum 1998 atangin Chhiat tawh chungchang a mipuite hriattir nan Information Mike hman tan ani.
  • Kum 1999 ah tuna kan Y.M.A Hall Concrete ban phun tan niin Kum 2003 ah hawn ani.
  • Kum 2001 ah ‘Y.M.A Zawlbuk’ Concrete a sak tan ani.
  • Kum 2003 ah Bawngkawn Branch Y.M.A din Kum 35 na (Coral Jubilee) lawm ani
  • Kum 2003 ah Section pakhat, Vanapa Section ni thin chu Bawngkawn Chhimveng Branch Y.M.A hming a an indan tak avangin Section Pali :Khuangchera Section, Neuva Sec tion, Saizahawla Section leh Taitesena Section ti a siamrem leh ani.
  • Kum 2005 ah C.Y.M.A, Inter Branch Chess Tournament ah pakhatna kan ni.
  • Kum 2006 ah C.Y.M.A, Inter Branch Volleyball Tournament (Women) ah Pathumna kan ni.
  • Kum2007 (11.12.2007) ah tuna Y.M.A Committee room hi hman tan ani.
  • Kum 2008 ah Y.M.A Zawlbuk enkawltu tur Chokidar neih tan ani.
  • Kum 2008 ah Section siamthat leh niin, Section paruk: Chawngbawla Section, Khuangchera Section, Neuva Section, Saizahawla Section, Taitesena Section leh Vanapa Section ah te siam leh niin tun thlengin hetiang hian la kal chhoh zel ani.
  • Kum 2010 ah Central Y.M.A Kumpuan, ‘ Ruihhlo Do’ bawhzui tha Lawmman pahnihna kan dawng.
  • Kum 2010, 2011 leh 2012 ah te hian Central Y.M.A Chanchinbu la hnem ber lawmman kan dawng.
  • Kum 2011 atangin Kuang siam nan a Thingphek kan hman thin chu Plyboard a thlak ani.
  • Kum 2012 ah Mithi lumen zan a hman turin Keyboard lei ani.
  • Kum 2015 ah CYMA Inter Branch Football Tournament (Men) ah Pathumna kan ni.
  • Kum 2015 ah Thlanmual – Bawngkawn Chhimveng chuanhnuai kawng Motor lut thei a laih ani.
  • Kum 2015 ah Mizoram a a hmasaber atan Y.M.A Zaipawl Music Video Album, ‘Insuihkhawm ila’, tih chu siam ani.
  • Kum 2015 ah Brigade Kawng laih zauh ani.
  • Kum 2015 ah Central Y.M.A in a kalpui ‘Ramngaw leh Nungcha Humhalh tha’ lawmman pathumna kan dawng.
  • Kum 2016 ah Thlan laih lawk hnatlang neih tan ani.
  • Kum 2018 atangin Mithi buhfai khawn chungchangah Section Ways a khawn tan ani.
  • Golden Jubilee pual in Branch Y.M.A leh Institute of Laboratory Science (ILS) tangkawp in Ni. 8th September, 2018 (Nilaini) khan Free Clinic Camp neih ani.
  • Kum 2018 ah Armed Veng Branch Y.M.A buatsaih Inter Branch Carrom Tournament ah tel ve niin Semi-Final kan thleng.